Vakiteny voalohany

Ny Asan'ny Apostoly 14,19-28.

Kanjo nony tonga nanodidina azy ny mpianatra, dia nitsangana izy, ka niditra tao an-tanàna. Ny ampitso ihany dia lasa nankany Derbe izy sy Barnabe.
Ary rahefa nitory ny Evanjely tamin'izany tanàna izany izy ka nahazo mpianatra maro, dia niverina tany Listra sy Ikonioma ary Antiokia,
nankahery fo ny mpianatra, sy namporisika azy haharitra amin'ny finoana, ary nilaza fa amim-piaretana fahoriana betsaka no tsy maintsy hidirantsika amin'ny fanjakan'Andriamanitra.
Isan'Eglizy nalehany, nony efa nivavaka sy nifady hanina izy ireo dia nanendry Pretra, sy nanankina azy tamin'ny Tompo izay efa ninoany.
Dia namaky an'i Pisidia izy ireo, ka tonga tany Panfilia.
Ary rahefa nitory ny tenin'ny Tompo tany Perjy izy, dia nidina nankany Atalia.
Avy ao izy, dia niondrana an-tsambo hankany Antiokia, fa teo no nanolorana azy hoentin'ny fahasoavan'Andriamanitra hanao ny asa izay vitany.
Vao tonga tao izy, dia namory ny fiangonana, ka nitantara ny zavatra lehibe nataon'Andriamanitra taminy, sy ny namohany ny varavaran'ny finoana ho an'ny jentily.
Ary elaela ihany no niarahany nitoetra tamin'ny mpianatra tao Antiokia.

Salamo

Salamo 145(144),10-11.12-13ab.21.

Midera anao avokoa ny asanao rehetra, ry Tompo, ary misaotra anao ny mpino anao.
Milaza ny voninahitry ny fanjakanao izy, ary mitory ny fahefanao;
mba hampahalalany ny zanaky ny olona ny asany mahagaga, 
sy ny famirapiratry ny fanjakany be voninahitra.

Fanjakana mandrakizay ny fanjakanao
ary maharitra amin'ny taona rehetra ny fanapahanao.
Aoka ny vavako hitory fiderana an'ny Tompo, 
ary ny nofo rehetra hisaotra ny anarany masina mandrakizay doria!

Evanjely

Evanjely Masin'i Jesoa kristy Nosoratan'i Md. Joany 14,27-31a.

Tamin'izany andro izany dia hoy i Jesoa tamin'ny mpianany: Fiadanana no avelako aminareo, fiadanako no omeko anareo, tsy mba tahaka ny fanomen'izao tontolo izao no omeko anareo. Aoka tsy hitebiteby na hatahotra ny fonareo.
Efa renareo fa izao no voalazako taminareo: Handeha aho, nefa mbola hiverina ho atý aminareo. Raha tia ahy hianareo, dia ho faly tokoa amin'izao handehanako ho any amin'ny Ray izao, satria lehibe noho izaho ny Ray.
Ary izaho no milaza izany aminareo dieny ankehitriny mbola tsy tonga izany, dia ny mba hinoanareo rahefa tonga izany.
Tsy hilaza zavatra maro aminareo intsony aho, fa avy ny mpanapaka izao tontolo izao; tsy manana na inona na inona amiko anefa izy,
fa mba ho fantatr'izao tontolo izao fa tiako ny Ray, ka araka izay nandidiany ahy no ataoko. Mitsangàna, andeha isika hiala eto.