Alahady Fahaenina amin'ny Paka

Vakiteny voalohany

Ny Asan'ny Apostoly 8,5-8.14-17.

Ary Filipo nidina tany an-tanànan'i Samaria, ka nitory ny Kristy tamin'ny olona tao.
Nandre sy nahita ny fahagagana nataon'i Filipo ny vahoaka maro be, ka nihaino tsara izay nolazainy.
Fa maro ny olona azon'ny fanahy maloto no nivoahany tamim-pikiakiahana mafy; betsaka ny malemy sy ny mandringa no sitrana koa;
ka hafaliana moa izany no tao amin'izany tanàna izany!
Rahefa ren'ny Apostoly tany Jerosalema fa nandray ny tenin'Andriamanitra ny tany Samaria, dia nirahiny hankany Piera sy Joany.
Nony tonga tany izy roa lahy, dia nivavaka ho an'ny olona mba handraisany ny Fanahy Masina;
satria vita batemy tamin'ny anaran'i Jesoa Tompo ihany izy ireo, fa tsy mbola nisy nidinan'ny Fanahy Masina na dia iray aza.
Dia nametrahany tànana izy ireo, ka nandray ny Fanahy Masina.

Salamo

Salamo 66(65),1-3a.4-5.6-7a.16.20.

Ho an'ny mpampianatra hira. Fihirana. Salamo.
Manaova hobin-kafaliana mankamin'Andriamanitra, ry tany rehetra; 
hirao ny voninahitry ny anarany, ataovy manetriketrika ny fankalazana azy.
Lazao amin'Andriamanitra hoe: Endrey, mahatahotra ny asanao!
Ny tany rehetra anie hiankohoka eo anatrehanao, 
hihira ho an'ny voninahitrao, hankalaza ny anaranao!

Avia ka banjino ny asan'Andriamanitra! 
Fa mahatahotra ny hevitra kasainy amin'ny zanak'olombelona.
Nampodiny ho tany maina ny ranomasina, 
ka nandeha an-tongotra namaky ny ony ny olona, 
dia nifaly taminy izahay.
Manjaka mandrakizay amin'ny fahefany izy; mitsinjo ny firenena ny masony.

Avia, mihainoa fa holazaiko aminareo, 
hianareo rehetra matahotra an'Andriamanitra, 
izay nataony ho an'ny fanahiko.
Isaorana anie Andriamanitra, 
izay tsy nandà ny fivavahako, 
na nanaisotra ny fahasoavany tamiko!

Vakiteny faharoa

Taratasy Voalohan'i Md. Piera 3,15-18.

Ny Kristy Tompo no ankamasino ao am-ponareo. Aoka ho vonona mandrakariva hianareo hamaly amin-kamoram-po sy fanajana an'izay rehetra manontany anareo ny amin'ny antony fanantenana izay ao anatinareo.
Aoka ho tsara ny hitsim-ponareo, mba ho amin'izay anendrikendrehana anareo indrindra no hampahamenatra an'ireo mpanaratsy ny fitondran-tena tsara ataonareo ao amin'ny Kristy.
Fa aleo amin'ny fanaovan-tsoa no miaritra fahoriana, raha izany no sitra-pon'Andriamanitra, toy izay amin'ny fanaovan-dratsy.
Na ny Kristy koa aza, niaritra fahafatesana indray mandeha noho ny otantsika, dia izy marina ho an'ny tsy marina, mba hanolorany antsika amin'Andriamanitra, ka novonoina tamin'ny nofo izy, fa novelomina tamin'ny fanahy.

Evanjely

Evanjely Masin'i Jesoa kristy Nosoratan'i Md. Joany 14,15-21.

Tamin'izany andro izany, hoy Jesoa tamin'ireo mpianany: Raha tia ahy hianareo, dia hitandrina ny didiko.
Ary izaho kosa hangataka amin'ny Ray, ka homeny Mpanafaka alahelo hafa hianareo, mba hitoetra ao aminareo mandrakizay,
dia ny Fanahin'ny fahamarinana, izay tsy azon'izao tontolo izao raisina, satria tsy hitany ka tsy fantany, fa hianareo no hahafantatra azy, satria hitoetra ao aminareo sy ao anatinareo izy.
Tsy havelako ho kamboty hianareo, fa hankaty aminareo aho.
Raha afaka kelikely, dia tsy hahita ahy intsony izao tontolo izao; fa hianareo no hahita ahy, satria velona aho, ary ho velona koa hianareo.
Amin'izany andro izany, dia ho fantatrareo fa izaho ao amin'ny Raiko, hianareo ato amiko, ary ho velona koa hianareo.
Izay manana ny didiko ka mitandrina azy no tia ahy; ary izay tia ahy, dia hotian'ny Raiko, sy hotiako koa, ka haneho ny tenako aminy aho.