Alatsinainy Fahafito amin'ny Paka

Vakiteny voalohany

Ny Asan'ny Apostoly 19,1-8.

Raha mbola tany Korinta Apolo, Paoly kosa tonga tany Efezy rahefa nitety ny faritany ambony tany Asia. Nony nahita mpianatra sasany teo izy,
dia nanao taminy hoe: Efa nandray ny Fanahy Masina va hianareo, fony vao nino? Fa hoy izy ireo taminy: Tsy mbola nandre akory aza izahay fa hoe misy Fanahy Masina.
Ary hoy izy: Batemin'iza no noraisinareo? Batemin'i Joany, hoy ireo.
Dia hoy Paoly: Batemin-pibebahana no nomen'i Joany, fa ilay ho avy ao aoriany, izany hoe, Jesoa no nambarany ho tsy maintsy hinoan'ny vahoaka.
Nony nahare izany izy ireo, dia nangataka hatao batemy amin'ny anaran'i Jesoa Tompo;
ary rahefa nametrahan'i Paoly tànana indray, dia nidinan'ny Fanahy Masina, ka niteny fiteny samihafa sady naminany;
tokony ho roa ambin'ny folo lahy izy rehetra.
Nony afaka izany, dia niditra tao amin'ny sinagoga i Paoly, ka niteny tamin-kasahiana, ary nampianatra telo volana nilazalaza ny momba ny fanjakan'Andriamanitra tamin'ny lahateny mandaitra.

Salamo

Salamo 68(67),2-3.4-5ac.6-7ab.

Aoka hitsangana Andriamanitra, ka hiely ny fahavalony, ary handositra ny tavany, ireo mankahala azy.
Tahaka ny fisavan'ny setroka, no andringano an'ireny; tahaka ny fiempon'ny savoka eo amin'ny afo no aoka hahalevona ny ratsy fanahy eo anatrehan'Andriamanitra.
Fa ny marina kosa aoka hifaly sy hiravoravo eo anatrehan'Andriamanitra, aoka hientan-kafaliana izy ireo!
Mihirà ho an'Andriamanitra, mankalazà ny anarany! Misavà lalana ho an'ilay tamy mamaky ny tany lemaka! Iaveh no anarany, mifalia eo anatrehany!

Mihirà ho an'Andriamanitra, mankalazà ny anarany! Misavà lalana ho an'ilay tamy mamaky ny tany lemaka! Iaveh no anarany, mifalia eo anatrehany!
Rain'ny kamboty, mpitsara ny mpitondra-tena izy, Andriamanitra eo amin'ny fonenany masina.
Ireo nilaozana, dia omen'Andriamanitra trano; manafaka ny voababo sy mamerina azy eo amin'ny fiadanana izy; ny mpiodina ihany no tavela eo amin'ny efitra mahamay.
Ireo nilaozana, dia omen'Andriamanitra trano; manafaka ny voababo sy mamerina azy eo amin'ny fiadanana izy; ny mpiodina ihany no tavela eo amin'ny efitra mahamay.

Evanjely

Evanjely Masin'i Jesoa kristy Nosoratan'i Md. Joany 16,29-33.

Dia hoy ny mpianany taminy: Indro milaza tsotra hianao ankehitriny, fa tsy manao fanoharana akory.
Fantatray amin'izao fa mahalala ny zavatra rehetra hianao, ka tsy mila hanontanian'olona: izany no inoanay fa avy amin'Andriamanitra hianao.
Jesoa namaly azy hoe: Mino ange hianareo ankehitriny?
Indro avy ny andro, na efa tonga sahady aza, izay hielezanareo samy ho any amin'izay halehany avy, sy handaozanareo ahy ho irery; nefa tsy irery aho tsy akory, fa ato amiko ny Ray.
Izaho no nilaza izany taminareo, dia mba hanananareo fiadanana amiko. Hozoim-pahoriana hianareo eto amin'izao tontolo izao; fa matokia, efa nandresy an'izao tontolo izao aho.