Vakiteny voalohany

Boky Voalohan'ny Makabeo 1,10-15.41-43.54-57.62-64.

Samy nisatroka ny satro-panjakana izy ireo, mbamin'ny zanany nandimby azy taorian'ny nahafatesany, nandritra ny taona maro, ary nampitomboiny be ny loza eto an-tany.
Nisy solofom-paharatsiana anankiray nivoaka avy amin'ireo mpanjaka ireo, dia Antiokosa Epifana, zanak'i Antiokosa mpanjaka, izay natao antoka tany Roma, sy tonga mpanjaka tamin'ny fahafito amby telopolo amby zato taonan'ny fanjakan'ny Greka.
Tamin'izany andro izany, nisy taranaka mpivadika avy amin'Israely ka nitarika ny hafa betsaka koa, nanao hoe: Andeha isika hikambana amin'ireo firenena manodidina antsika, fa nidiran-doza maro isika, hatrizay nitokanantsika lavitra an'ireo izay.
Ary nataony ho mety harahina izany teny izany.
Ka ny sasany tamin'ny vahoaka dia rototra nanatona ny mpanjaka, ka nomeny làlana hanaraka ny fanaon'ny firenena.
Nanorina toerana fanaovana asa tena mampatanjaka tao Jerosalema, araka ny fanaon'ny firenena, izy ireo.
Ny fitoerana masina tonga foana toa tany efitra, ny fetiny niova ho andro fisaonana, ny sabatany ho fahafaham-baraka, ary ny voninahiny ho fandatsana azy.
Araka ny voninahiny no nitomboan'ny fietreny, ary ny fahalehibeazany zary fisaonana.
Namoaka didy tamin'ny fanjakany manontolo Antiokosa mpanjaka, mba hiraisan'izy rehetra ho vahoaka tokana, fa samy hanary ny lalàny manokana.
nandidy ireo tanànan'i Jodà koa izy, mba samy hanatitra sorona isan-tanàna.
Be ny Jody no nikambana tamin'ny Siriana, dia izay rehetra nanary ny lalàna; nanao ny ratsy tamin'ny tany izy ireo;
ka hany herin'ny Israelita tsy nivadika, dia nandositra eny amin'ny fitoerana takona sy amin'izao karazam-pierena rehetra izao.
Tamin'ny andro fahadimy ambin'ny folon'ny volana Kasleo, taona fahadimy amby efapolo amby zato, dia naoriny teo ambony otelin'ny sorona dorana, ny fahavetavetana lozan-tany. Nanorenany otely koa teo amin'ny tanànan'i Jodà rehetra, eny amin'ny manodidina.
Ny fahadimy amby roapolon'ny volana izy ireo dia nanatitra sorona teo amin'ilay otely naorina teo ambonin'ny otelin'ny sorona dorana.
Araka ny lalàna koa, izay vehivavy nampamora ny zanany dia novonoina ho faty, nahantona teo am-bozony ny zanany;
norobaina ny tao an-tranony ary natao maty izay nanao ny fandidiana.

Salamo

Salamo 119(118),53.61.134.150.155.158.

Azon'ny hatezerana aho noho ny amin'ny ratsy fanahy, izay mahafoy ny lalànao.
Manodidina ahy ny fandriky ny ratsy fanahy, fa tsy manadino ny lalànao aho.
Afaho amin'ny fampahorian'ny olombelona aho, dia hitandrina ny didinao.
Efa mby akaiky ireo mpanaraka ny ratsy, izay nihataka tamin'ny lalànao.
Lavitra ny ratsy fanahy ny famonjena, satria tsy asiany raharaha ny lalànao.
Tsiravina aho, mahita ny mpivadika, satria tsy mba mitandrina ny teninao ireny.

Evanjely

Evanjely Masin'i Jesoa Kristy nosoratan'i Md. Lioka 18,35-43.

Nony mby tao akaikin'i Jerikao izy, dia nisy kosa jamba anankiray nipetraka nangataka teo amoron-dàlana.
Ary nony nandre ny vahoaka nandalo izy dia nanontany hoe inona izany?
ka nilazana fa Jesoa avy any Nazareta no nandalo.
Dia niantso izy nanao hoe: Ry Jesoa Zanak'i Davida ô! mamindrà fo amiko.
Noraran'izay teo aloha izy mba hangina, fa vao mainka niantso mafimafy kokoa nanao hoe: Ry Zanak'i Davida ô! mamindrà fo amiko e!
Dia nijanona Jesoa, ka nasainy hoentina mankeo aminy izy. Ary nony tonga teo akaikiny dia nanontaniany hoe:
Inona no tianao hataoko aminao? Ary hoy izy: Mba hahiratra aho, Tompoko.
Dia hoy Jesoa taminy: Mahiràta, ny finoanao no nahavonjy anao.
Niaraka tamin'izay, dia nahiratra izy ka nanaraka azy sy nankalaza an'Andriamanitra. Ary ny vahoaka rehetra nahita izany koa nidera an'Andriamanitra.

Fiheverana