Alahady Fahavalo ambin'ny folo tsotra Mandavan-taona

Vakiteny voalohany

Bokin'Izaia 55,1-3.

Hianareo rehetra izay mangetaheta, mankanesa aty amin'ny rano, na dia hianareo tsy manam-bola aza; avia mividiana vary, ka mihinàna; avia hividy tsy amim-bola, na takalo, hividy divay sy ronono.
Nahoana hianareo no mandany vola amin'izay tsy hanina; sy izay nisasaranareo, amin'izay tsy mahavoky? Koa mihainoa ahy, ary mihinana izay tsara; ary aoka ny fanahinareo hiravoravo amin'izay hanina fy.
Atongilano ny sofinareo, ka mankanesa aty amiko; mihainoa ka aoka ho velona ny fanahinareo; ary hanao fanekena mandrakizay aminareo aho, ka hanome anareo ny fahasoavana nampanantenaina an'i Davida.

Salamo

Salamo 145(144),8-9.15-16.17-18.

HETH Mamindra fo sy miantra Iaveh, ary mahari-po sy feno hatsaram-po.
TETH Tsara fo amin'ny olona rehetra Iaveh, ary mihatra amin'ny zava-boahariny rehetra ny famindram-pony.
AIN Mitodika miandry anao ny mason'ny zavatra rehetra, ary omenao izay haniny amin'ny fotoany izy.
PHE Sokafanao ny tànanao, dia vokisanao soa avy aminao ny miaina rehetra.
TSADE Marina amin'ny làlany rehetra Iaveh, ary mamindra fo amin'ny asany rehetra.
KOPH Eo akaikin' izay rehetra miantso azy Iaveh, dia izay rehetra miantso azy amin'ny fony tokoa.

Vakiteny faharoa

Taratasin'i Md. Paoly Apostoly ho an'ny Romana 8,35.37-39.

Koa iza àry no hahasaraka antsika amin'ny fitiavan'ny Kristy? Fahoriana va, sa fahaterena, sa fanenjehana, sa fahanoanana, sa fitanjahana, sa loza, sa sabatra?
Amin'izany rehetra izany anefa, dia mihoatra noho ny mpandresy isika, amin'ny alalan'ilay tia antsika.
Satria matoky aho fa na fahafatesana, na fiainana, na anjely na ireo fanapahana, na zavatra ankehitriny, na zavatra ho avy, na ireo fahefana,
na ny any ambony, na ny any ambany, na zava-boary hafa, dia tsy hahasaraka antsika amin'ny fitiavan'Andriamanitra izay ao amin'i Kristy Jesoa Tompontsika.

Evanjely

Evanjely Masin'i Jesoa Kristy nosoratan'i Md. Matio 14,13-21.

Nony nandre izany Jesoa, dia niala teo ka niondrana an-tsambo kely mba hitokana samy irery any an'efitra; fa rahefa nahare izany ny vahoaka, dia niainga avy amin'ny tanàna samihafa ka nandeha an-tongotra nanaraka azy.
Rahefa niala tao an-tsambo izy, dia nangoraka nahita ireto vahoaka betsaka, ka nositraniny ny marary teo aminy.
Ary nony hariva ny andro, dia nanatona azy ny mpianany nanao hoe: Tany efitra ity, ary efa hariva ny andro; koa ravao ny vahoaka handeha hividy hanina eny amin'ny vohitra.
Fa hoy Jesoa taminy: Tsy tokony handeha izy, fa omeo hanina.
Dia hoy ireo taminy: Tsy misy afa-tsy mofo dimy sy hazandrano roa atý aminay.
Ento atý amiko izany, hoy izy taminy.
Dia nasainy nipetraka tamin'ny ahitra ny vahoaka, ary noraisiny ny mofo dimy sy ny hazandrano roa, dia niandrandra ny lanitra izy ka nitso-drano; ary nony efa novakiny ny mofo dia nomeny ny mpianany, ka nozarain'ny mpianany tamin'ny vahoaka.
Dia nihinana izy rehetra ka voky, ary nangonina ny sombintsombiny sisa tsy lany ka nahafeno sobika roa ambin'ny folo.
Nefa dimy arivo lahy no isan'ny nihinana afa-tsy ny zaza amam-behivavy.